Lois Rottonara ROTT é nasciü a La Ila tl 1938. Do avëi frecuenté la Scola d’ert de Sëlva ál stlüt jö i stüdi al Magistero d’ert a Firenze. Al s’á dé jö cun l’insegnamënt por passa 20 agn tles scores de Milan, dla Val Badia y te deplü Istituc dla Lombardia. Te süa ativité artistica s’ál dediché ala scoltöra, pitöra y inrescida de tecniches nöies laoran cun deplü sortes de materiai tla scoltöra sciöche lëgn, brom, petun, ceramica y tla pitöra cun öre sön drap, temperes, acuarei, dessëgns y cun pitöres murales. Les operes de Rott é da ciafé a livel internazional pro Galeries y Istituc d’ert, dlijies, operes publiches y coleziuns privates.
L’ert de ROTT é caraterisada dala preferënza por le ciaval y por la figöra feminila sciöche sogec artistics y so stil unich é caraterisé dales figöres “spacades”, sides tles scoltöres che tles pitöres. Dala sfëssa definida tres le corp dl soget vëgnel a löm na rapresentaziun realistica de öna na pert, dl profil, deperpo che l’atra pert se presënta sciöche nia definida, te n ecuiliber danter pert y totalité, ester y nia ester, realté y some. I corusc stersc ti dá espresciun al conzet de ligrëza, de pasciun y de belëza.
MOSTRES
ROTT á fat mostres personales y á tut pert a mostres coletives tl’Europa, dantadöt tla Talia y ti Paisc Todësc, tl Nord- y tl Süd America. Danter les plü significatives:
Tl 2017 ál metü fora tl contest dla 57. Bienala d’ert de Aunejia tl Palazzo Albrizzi y tl 2013 tl MART a Rorëi; tl 2023 ál presenté sües operes dala coleziun Haute Arte Couture by ROTT dala defilada ROTT – Ert y Musiga dala Milano Fashion Week y tl 2021 ál presenté sciöche premiera la Istalaziun Haute Art Couture by ROTT tla Galaria Vittorio Emanuele a Milan en gaujiun dla Milano Fashion Week de setëmber; tl 2018 ala mostra Essentia. Tra spazio e tempo sot al patrozine dl Ministero degli Affari Esteri tl Istituto Italiano di Cultura a Cracau (Polonia); tl 2016 a Spoleto Arte curatada da Vittorio Sgarbi al Festival dei due Mondi y pro D.O.C. – artisć por investí de Paolo Levi ala Trienala de Verona, a New York y a Washington; tl 2015 ál tut pert ala mostra internazionala Miami meets Milano a Miami metüda a jí dala Biennale Milano tl contest de Miami Art Basel; tl 2012 ál ilustré cun sües operes le Calënder d’Advënt artistich dla BMW; al á metü fora tl Palaz dla Permanente a Milan en gaujiun dla LXXII Mostra annuale d’arte della regione lombarda; tl 2014 ala Bienala d’ert de ArtExpó tl Prinzipat de Monaco; tl 2020 y tl 2021 a Art & Cavallo Verona y a Ester Ladins tl Messner Mountain Museum a Bornech.
Rott vëgn dant te deplü Catalogs d’ert de importanza nazionale y internazionala sciöche:
- Artisti ’22, Annuario internazionale di arte contemporanea, Mondadori 2022;
- Maestri, curaté da Vittorio Sgarbi, 2016;
- Italiani – Selezione d’arte contemporanea, curaté da Vittorio Sgarbi, 2016;
- Pittori e scultori italiani del Novecento – Il Quadrato, 2005
- Pittori e scultori italiani di importanza europea – Il Quadrato, 1992;
- Bolaffi –Catalogo della scultura italiana, Nr.5, 1981;
- LXXII Mostra annuale d’arte della regione lombarda (1972);
- Art Now – Italian Masters (2020)
- Itinera –percorsi dell’arte locale in Alto Adige, 1995
- Percorso ricognitivo nella scultura altoatesina, 1990-1993
- Artisć Val Badia, EPL, 1996
OPERES PUBLICHES:
Via Crucis -danter les plü importantes chëra tla dlijia de S.Maria Goretti a Milan (1984) y tla dlijia de Barbisano (TV), sciöche ince deplü monumënc d’ert sacrala.
Tl 2007 ál ziplé na cripl por le Papa Benedët XVI.
ROTT á ilustré deplü operes leterares y d’atri tesć a livel internazional –ciara ala seziun dedicada.
Al á fat pert dl comitat artistich pro la mostra panorama & Panorama organisada dala Provinzia Autonoma de Balsan dl 1987 y é sté sides mëmber co presidënt de iuria pro deplü concursc artistics.
INSTALAZIUNS Y PROIEC MULTIMEDIAI
Tl cheder dl proiet ROTT – Ert y Musiga en colaboraziun cun süa möta, la musizista Susy Rottonara, él sté consulënt artistich pro le film Le Rëgn de Fanes, che á davagné deplü pesć a livel internazional a London y ti U.S.A. Tl 2011 ál depënt i chedri scenics por l’opera sperimentala Fanes Poem Musical. Tl 2013 ái realisé l’istalaziun multimediala Dolasila, che á albü süa premiere tl MART de Rorëi y é spo gnüda presentada tl Museum-Fondaziun L.Matalon a Milan y tl 2014 tl Istitut de Cultura Taliana a La Valletta a Malta. tl 2016 ál depënt i chedri scenics por le conzert multimedial Le some de Dolasila. Tl 2017 na videoistalaziun de ert y musiga da Le some de Dolasila á tut pert ala mostra intenrazionala Energia creativa – tra astrazione e figurazione tl contest dla 57. Bienala d’ert a Aunejia tl Palazzo Albrizzi, sënta dl pavillon dl Guatemala. Tl 2021 él gnü a se le dé premiera la Istalaziun Haute Art Couture by ROTT tla Galaria Vittorio Emanuele a Milan en gaujiun dla Milano Fashion Week de setëmber, che fej pert dl proiet multimedial Midsummer blooming 2021 che á ciafé le patrozine dl Istituto Nazionale Arte Cultura Spettacolo. Tl 2023 ál presenté sües operes dala coleziun Haute Arte Couture by ROTT dala defilada ROTT – Ert y Musiga dala Milano Fashion Week
